پاک فوج دنیا کی دس طاقتور ترین افواج میں شامل

واشنگٹن(پاک ترک نیوز) دنیا کی طاقت ور ترین 145ممالک کی افواج کی نئی فہرست جاری کردی گئی ۔پاک فوج دنیا کی پہلی دس بہترین افواج میں شامل ہے ۔
عالمی شہرت یافتہ ویب سائٹ گلوبل فائر پاور دنیا کی طاقت ور ترین افواج کی فہرست جاری کرتی ہے۔ یہ فہرست مذکورہ ملک کے 60 عناصر کو مدنظر رکھتے ہوئے بنائی جاتی ہے۔
ان عناصر میں جغرافیائی اہمیت، ملٹری یونٹس کی تعداد اور معاشی حالات بھی شامل ہیں۔ ان عناصر کی مدد سے دنیا کی طاقت ور ترین افواج کا انڈیکس ریٹ تیار کیا جاتا ہے۔فہرست میں پاک فوج دنیا کی 145 میں سے طاقت ور ترین افواج میں نویں نمبر پر ہے۔ پاک فوج کی انڈیکس ریٹنگ 0.1711 ہے۔
فہرست میں 0.0699 انڈیکس ریٹنگ کے ساتھ امریکا اوّل نمبر پر ہے جب کہ روس دوسرے اور چین تیسرے نمبر پر ہے جن کی انڈیکس ریٹنگ بالترتیب 0.0702 اور 0.0706 ہے۔
چوتھے اور پانچویں نمبر پر بھارت اور جنوبی کوریا جبکہ برطانیہ، جاپان اور ترکیہ بالترتیب چھٹے، ساتویں اور آٹھویں نمبر پر براجمان ہیں۔ اٹلی دسویں نمبر پر ہے۔
گلوبل فائر پاور کے مطابق کمزور ترین افواج میں بھوٹان، ملڈووا اور سرینیم شامل ہیں۔