وزیر اعظم کا صنعتوں کیلئے بجلی کی قیمت 10 روپے 69 پیسے فی یونٹ کم کرنے کا اعلان
اسلام آباد(پاک ترک نیوز) وزیراعظم شہباز شریف نے ملکی صنعت کی بہتری کے لئے بجلی کے تاریخی پیکج کا اعلان کرتے ہوئے انڈسٹریز کے لئے بجلی کی قیمت میں 10روپے69 پیسے کی کمی کا اعلان کردیا۔
وزیراعظم نے صنعت اور برآمدات میں بڑے اضافے کے لئے تاریخی قدم اٹھایا اور ملکی صنعت کی بہتری کے لئے بجلی کے تاریخی پیکج کا اعلان کیا۔
وزیر اعظم شہباز شریف نے صنعتوں کے لئے بجلی کی قیمت میں 10 روپے 69 پیسے کی کمی کرتے ہوئے بجلی کی قیمت34 روپے 99 پیسے فی یونٹ مقرر کردی۔
یاد رہے کہ نیشنل الیکٹرک پاور ریگولیٹری اتھارٹی (نیپرا) نے صنعتوں کے لئے بجلی کی قیمت میں10روپے69 پیسے فی یونٹ کمی تجویز کی تھی۔
وزیراعظم کے خصوصی پیکج کے نتیجے میں صنعتوں سے 200 ارب روپے سے زائد کا بوجھ ختم ہوگا۔ ذرائع کا کہنا ہے کہ اس ریلیف کا مقصد عالمی منڈی میں اشیا کی لاگت مقابلے کے قابل بنانے کے لئے اٹھایا گیا ہے جبکہ اس سے صنعتی اور زرعی مصنوعات کی پیداواری لاگت میں کمی اور برآمدات میں خاطر خواہ اضافے کا امکان بھی ہے۔
وزیراعظم کے اس اعلان کی وجہ سے صنعتی ترقی کی رفتار مزید تیز جبکہ روزگار میں تیزترین اضافہ ہوگا۔ صنعتوں کے پہیے کی رفتار تیز اور برآمدات میں اضافے سے ملکی معیشت کو فائدہ ہوگا۔