پنجاب ورلڈ بینک کے تعاون سے زراعت اور لائیو سٹاک میں بہتری کیلئے میگا پراجیکٹ شروع کرے گا

لاہور(پاک ترک نیوز) پنجاب حکومت ورلڈ بینک کے تعاون سے زرعی ویلیو ایڈیشن اور انفراسٹرکچر کے ساتھ ساتھ لائیو سٹاک کو بہتر بنانے کے لیے ایک میگا پراجیکٹ شروع کرنے کا ارادہ رکھتی ہے۔
پروگرام کا جلد جائزہ لے کر منظوری کے لیے پنجاب کابینہ کو پیش کیا جائے گا۔
یہ بات پنجاب کے وزیر زراعت و لائیو سٹاک سید عاشق حسین کرمانی نے بدھ کو یہاں ایگریکلچر ہاؤس میں ورلڈ بینک کے وفد سے ملاقات کے دوران کہی۔
انہوں نے کہا کہ وزیر اعلیٰ پنجاب زرعی شعبے کی ترقی کے لیے عملی اقدامات کر رہے ہیں۔ اس سلسلے میں 400 ارب روپے کی کثیر لاگت سے "ٹرانسفارمنگ پنجاب ایگریکلچر” پروگرام پر عملدرآمد جاری ہے۔ اس پروگرام کے تحت کسانوں کو بلاسود زرعی قرضے فراہم کیے جا رہے ہیں، زرعی مشینری کے فروغ اور دیگر اہم اقدامات کیے جا رہے ہیں۔
ورلڈ بینک کے منیجر برائے زراعت پاکستان اور بھارت، اولیور بریڈتھ نے وزیر کو بتایا کہ ورلڈ بینک سمارٹ پروگرام کے تحت 2018 سے پنجاب حکومت کے ساتھ مل کر کام کر رہا ہے۔
اس سلسلے میں عالمی بینک نے 229.750 ملین ڈالر کی لاگت سے زرعی شعبے کی ترقی، انفراسٹرکچر اور مارکیٹوں کی بحالی کے لیے اقدامات کیے ہیں۔
ان اقدامات کے نتیجے میں پنجاب مارکیٹنگ ریگولیٹری اتھارٹی (PAMRA) کا قیام عمل میں آیا اور زرعی منڈیوں کو بہتر بنانے کے لیے اقدامات کیے گئے۔