ٹی 20 ورلڈ کپ: سیمی فائنل مقابلوں کا کل سے آغاز

لاہور(پاک ترک نیوز) آئی سی سی ٹی 20 ورلڈ کپ 2024ء میں کل سے سیمی فائنل مقابلوں کا آغازہوگا ۔ پہلے سیمی فائنل میں افغانستان اور جنوبی افریقہ میں جوڑ پڑے گا جبکہ دوسرے سیمی فائنل میں بھارت اور انگلینڈ کی ٹیمیں مد مقابل آئیں گی ۔
گروپ ون میں سے بھارت اور افغانستان کی ٹیموں نے سیمی فائنل کیلئے کوالیفائی کیا ہے جبکہ گروپ ٹو میں جنوبی افریقہ اور انگلینڈ کی ٹیمیں سیمی فائنل میں پہنچی ہیں۔
پہلی بار سیمی میں پہنچنے والی افغانستان اور سائوتھ افریقہ کے درمیان میچ کل صبح ساڑھے پانچ بجے شروع ہو گا جبکہ دفاعی چیمپئن انگلینڈ اور بھارت کل شام ساڑھے سات بجے مد مقابل آئیں گے ۔
افغانستان کرکٹ ٹیم کے کپتان راشد خان ٹی 20 کرکٹ میں تاریخ رقم کرتے ہوئے تیز ترین 150 وکٹیں لینے والے باؤلر بن گئے، انہوں نے 92 میچز میں 150 ٹی 20 انٹرنیشنل وکٹیں مکمل کیں، اس سے قبل نیوزی لینڈ کے ٹم ساؤتھی نے 118 میچز میں 150 وکٹیں مکمل کی تھیں۔
واضح رہے کہ ٹی 20 انٹرنیشنلز کی تاریخ میں اب تک صرف 2 کھلاڑیوں نے 150 وکٹیں لی ہیں جبکہ 129 میچز کھیلنے والے شکیب الحسن کو یہ سنگ میل عبور کرنے کیلئے ایک وکٹ درکار ہے۔