کیویز کیخلاف سیریز کیلئے قومی ٹیم کا اعلان تاخیر کا شکار

لاہور(پاک ترک نیوز) نیوزی لینڈ کے خلاف 5 میچوں پر مشتمل ٹی20 سیریز کیلئے قومی ٹیم کا اعلان تاخیر کا شکار ہوگیا۔
قومی ٹیم کے اسکواڈ کا اعلان راوں ہفتے ہونا تھا تاہم اب اس میں تاخیر ہوگئی ہے۔سلیکٹرز ممکنہ کھلاڑیوں پر مشاورت کیلئے اتوار کو میٹنگ کریں گے، بعدازاں کیویز کیخلاف قومی ٹیم کے اسکواڈ کا اعلان 8 اپریل یا اسکے بعد کیے جانے کا امکان ہے۔
سلیکٹرز پہلے ہی کاکول میں کپتان بابراعظم کے ساتھ سیریز کے امکانات پر بات چیت کے بعد لاہور واپس آچکے ہیں جہاں قومی اسکواڈ پاک فوج کی زیر نگرانی فٹنس کیمپ میں شریک تھا۔
زیر غور کھلاڑیوں میں کپتان بابراعظم، صائم ایوب، محمد رضوان، صاحبزادہ فرحان، سلمان علی آغا، افتخار احمد، اعظم خان، شاداب خان، اسامہ میر، شاہین شاہ آفریدی، نسیم شاہ، عماد وسیم، محمد عامر، زمان خان، عثمان خان، وسیم جونیئر، عرفان نیازی اور عباس آفریدی شامل ہیں جبکہ فخر زمان کے ہاتھ کی انجری کا جائزہ لیا جا رہا ہے۔
پاکستان سپر لیگ (پی ایس ایل) 9 کے دوران کندھے کی انجری کا شکار ہونے والے فاسٹ باؤلر حارث رؤف مکمل طور پر فٹ نہیں ہیں اور بحالی کا عمل جاری رکھیں گے۔
اطلاعات ہیں کہ فاسٹ بولر شاہین شاہ آفریدی کو ورک لوڈ مینجمنٹ کے تحت نیوزی لینڈ کیخلاف سیریز میں آرام کروایا جاسکتا ہے۔