وزیراعظم سے پاکستان بزنس کونسل دبئی،ابوظہبی کے وفد کی ملاقات

ابوظہبی (پاک ترک نیوز) وزیراعظم شہباز شریف سے آج پاکستان بزنس کونسل دبئ ،ابوظہبی اور بزنس کمیونٹی متحدہ عرب امارات کے ایک وفد نے ابو ظہبی میں ملاقات کی۔
ملاقات کرنے والوں میں مصطفے ہیمانی ،اقبال داود ،ڈاکٹر قیصر انیس ،مصطفے الطاف ،عمران فاروق جاوید ملک اور معروف بزنس مین شامل تھے ۔
وزیراعظم نے وفد سے بات چیت کرتے ہوئے کہا کہ انھیں یہ جان کر خوشی ہوئی ہے کہ پاکستانی بزنس مین اپنی محنت اور تجربے کو بروے کار لاتے ہوئے متحدہ عرب امارات میں اپنا اور پاکستان کا نام روشن کر رہے ہیں۔
وزیراعظم نے کہا کہ متحدہ عرب امارات کی قیادت سے انکی ملاقاتیں کامیاب رہیں۔انہوں نے مزید کہا کہ انکا یہ دورہ پاکستان اور متحدہ عرب امارات کی دوستی کو اسٹریٹجک پارٹنرشپ میں بدلنے میں مدد دے گا. انہوں نے کہا کہ جنیوا کانفرنس میں عالمی برادری نے توقع سے بڑھ کر اعلانات کیے۔
وزیراعظم نے پاکستان بزنس کونسل اور بزنس کمیونٹی متحدہ عرب امارات کے وفد کو پاکستان میں کاروبار اور سرمایہ کاری کی ترغیب دیتے ہوئے کہا کہ پاکستان میں توانائی , رئیل اسٹیٹ , انفارمیشن ٹیکنالوجی , متبادل توانائی, فوڈ پراسیسنگ , سیاحت اور دیگر شعبوں میں سرمایہ کاری کے بھرپور مواقع موجود ہیں اور حکومت سرمایہ کاروں اور بزنس مین کو تمام تر سہولیات دینے کے لیے بھرپور اقدامات کر رہی ہے۔
وزیراعظم نے وفد کو پاکستان میں سرمایہ کاری کے حوالے سے تجاویز کے ساتھ پاکستان آنے کی دعوت بھی دی۔
وفد نے حکومتی معاشی پالیسیز پر اطمینان کا اظہار کرتے ہوئے پاکستان میں کاروبار اور سرمایہ کاری میں گہری دلچسپی کا اظہار کیا. ملاقات میں وفاقی وزیر خزانہ و محصولات اسحاق ڈار, وفاقی وزیر تجارت سید نوید قمر, وفاقی وزیر دفاع خواجہ آصف اور سرکاری افسران نے شرکت کی۔