ترکیہ زلزلوں کے بعد ملک کو ملنے والی امداد کی تفصیلات جاری

انقرہ (پاک ترک نیوز)

ترکیہ کے جنوب مشرقی صوبوں میں آنے والے طاقتور زلزلوں کے بعد اب تک 16 ممالک نے زلزلہ زدہ علاقے میں 34 فیلڈ ہسپتال قائم کیے ہیں۔

ترک وزارت خارجہ کی جانب سے گذشتہ شب ٹویٹر پر شیئر کیے گئے گرافک کے مطابق اس وقت غیر ملکی نمائندوں کے تعاون سے کل 179,655 خیمے، 2,076 رہنے والے کنٹینرز اور 2,075 موبائل حفظان صحت کے یونٹ ترکی میں لائے جا چکے ہیں۔

ڈیزاسٹر زون میں فراہم کی جانے والی امدادی اشیاء میں تقریباً 1.9 ملین کمبل، 269,747 سلیپنگ بیگ، 96,462 بستر، 33,810 جنریٹر، 7,488 ٹن کپڑے، 4,109 ٹن حفظان صحت سے متعلق طبی سامان، 908 ٹن خوراک شامل ہے۔

6 فروری کو آنے والے 7.7 اور 7.6 کی شدت کے زلزلے 11 صوبوں ادیانا، ادیامان، دیاربکر، گازیانٹیپ، ہتاے، کلیس، ملاتیا، عثمانیہ، ایلاز اور سانلیورفا میں آئے۔ 13.5 ملین سے زیادہ لوگ تباہ کن زلزلوں سے متاثر ہوئے ہیں۔