ایشیا کپ کا میدان سجنے کو تیار ،افتتاحی میچ میں پاکستان اور نیپال مد مقابل

ملتان(پاک ترک نیوز) ایشیا کپ کا میدان سجنے کو تیارہے ،آج افتتاحی میچ میں پاکستان اور نیپال کی ٹیمیں ملتان میں مدمقابل آئیں گی۔
پاکستان کی میزبانی میں ایشیا کپ کے 16 ویں ایڈیشن کا باقاعدہ آغاز آج سے ملتان میں ہو گا۔
ٹورنامنٹ کے افتتاحی میچ میں قومی ٹیم بابر اعظم کی قیادت میں آج نیپال کے مد مقابل ہو گی، میچ ڈھائی بجے ملتان سٹیڈیم میں شروع ہو گا، میچ سے پہلے افتتاحی تقریب بھی ہو گی، نیپال کی ٹیم پہلی بار ایشیا کپ کھیلے گی جبکہ قومی ٹیم تیسری بار ٹائٹل جیتنے کا عزم لے کر میدان میں اترے گی، دونوں ٹیموں نے میچ سے قبل بیٹنگ، باؤلنگ اور فیلڈنگ کی بھرپور مشقیں کیں۔
ایشیا کرکٹ کپ 30 اگست سے 17 ستمبر تک پاکستان اور سری لنکا میں کھیلا جائے گا، ٹورنامنٹ میں شامل 6 ٹیموں کو 2 گروپس میں تقسیم کیا گیا ہے، گروپ اے میں پاکستان، بھارت اور نیپال کی ٹیموں کے درمیان مقابلہ ہو گا جبکہ گروپ بی میں دفاعی چیمپئن سری لنکا، بنگلہ دیش اور افغانستان کی ٹیموں میں جوڑ پڑے گا، گروپ سٹیج میں ہر ٹیم 2،2 میچ کھیلے گی۔
دونوں گروپس کی پہلے 2 نمبرز پر آنے والی ٹیمیں ٹاپ 4 کیلئے کوالیفائی کر جائیں گی، فائنل ٹاکرا سپر فور کی ٹاپ ٹو ٹیموں کے درمیان 17 ستمبر کو کولمبو میں ہو گا، گروپ سٹیج میں روایتی حریف پاک بھارت کی ٹیمیں 2 ستمبر کو کینڈی میں آمنے سامنے ہوں گی جبکہ دونوں ٹیموں کے درمیان 10 ستمبر کو ٹاپ فور میں بھی ٹاکرا ہونے کا قوی امکان ہے۔