دنیا کے سٹار فٹبالرز کے سعودی سٹار کھلاڑیوں سے دوستانہ میچ کی خصوصی ٹکٹ کی قیمت ایک کروڑ ریال تک پہنچ گئی

ریاض (پاک ترک نیوز)
ریاض سیزن کے فٹبال میچ کی منفرد، نمایاں اور خصوصی ٹکٹ کی نیلامی کے لئے بولی جاری ہے جس میں ٹکٹ کی قیمت ایک کروڑ ریال تک پہنچ گئی ہے۔ خصوصی ٹکٹ پر بولی 17 جنوری تک جاری رہے گی۔
سعودی میڈیا کی رپورٹ کے مطابق سعودی تاجر عبد العزیز بغلف نے ٹکٹ کی 30 لاکھ ریال کی بولی لگائی تھی جس پر معرف تاجر بندر الضحیک نے 35 لاکھ ریال کی بولی لگا دی۔بعد ازاں ابراہیم المہیدب نے ٹکٹ کی قیمت بڑھا کر 40 لاکھ ریال تک کر دی ۔اسکے
کچھ دیر بعد معروف تاجر خالد المشرف نے 70 لاکھ کی بولی لگائی اور پھر اپنی بولی پر بولی لگا کر اسے 90 لاکھ تک پہنچا دیا۔ایسے میں محمد المنجم نے مداخلت کی اور ٹکٹ کی 93 لاکھ ریال کی بولی لگا دی۔اس کے بعد مشرف الغامدی نے ٹکٹ کی قیمتایک کروڑ ریال تک بڑھا دی ہے۔ٹکٹ پر بولی 17 جنوری تک جاری رہے گی اور توقع ہے کہ اس کی قیمت میں مزید اضافہ ہو گا۔
واضح رہے کہ ریاض سیزن کے تحت ایک تاریخی فٹبال میچ پیرس سینٹ جرمین فٹبال کلب اور مقامی فٹبال کلب النصر اور الہلال کے سٹار کھلاڑیوں کے درمیان ہونے جا رہا ہے۔اس میچ میں النصر کلب کے سٹار کھلاڑی کرسٹیانو رونالڈو، میسی، نیمار اور دیگر سٹار کھلاڑی شریک ہوں گے۔
اس دوستانہ میچ کی خاص بات یہ ہے کہ اس میں الہلال اور النصر کے سٹار کھلاڑیوں کا دنیا کے معروف سٹار کھلاڑیوں کے ساتھ مقابلہ ہو گا۔ ریاض سیزن انتظامیہ نے اس میچ کی ایک ممتاز، منفرد اور نمایاں ٹکٹ متعارف کرائی ہےجس پر عام بولی لگائی جا رہی ہے۔