عمران خان سیلاب زدگان کیلئے آج ٹیلی تھون کریں گے

اسلام آباد (پاک ترک نیوز) سابق وزیراعظم اور پاکستان تحریک انصاف کے چیئرمین عمران خان سیلاب زدگان کی مدد کیلئے آج ٹیلی تھون کریں گے ۔سابق وزیراعظم نے دنیا بھر میں موجود پاکستانیوں کو شرکت کی دعوت دیدی۔
ٹیلی تھون کے ذریعے مخیرحضرات سے سیلاب متاثرین کیلئے چندہ جمع کیا جائے گا، اس موقع پر پنجاب اور خیبرپختونخوا کے وزرائے اعلی بھی عمران خان کے ساتھ ہوں گے۔چیئرمین تحریک انصاف عمران خان آج رات ساڑھے 9 سے 12 بجے سیلاب متاثرین کیلئے بین الاقومی ٹیلی تھون منعقد کریں گے۔
عمران خان نے سیلاب متاثرین کیلئے ٹیلی تھون سے متعلق خصوصی پیغام میں کہا تھا کہ اللہ نےہمیں بڑےامتحان میں ڈالا ہے، 2010 سے بھی بڑا سیلاب آج پاکستان میں آیا ہوا ہے۔
سابق وزیراعظم عمران خان کا کہنا تھا کہ ملک کے بہت سےعوام سیلاب سے شدید متاثر ہیں، سیلاب متاثرین کیلئےٹیلی تھون کے ذریعے پیسے اکٹھے کر رہا ہوں۔
چیئرمینت پی ٹی آئی نے تمام پاکستانیوں اور اوورسیز کو ٹیلی تھون میں شرکت کی دعوت دیتے ہوئے کہا جیسے جیسے پیسہ آئے گا سیلاب متاثرین میں تقسیم کریں گے۔
ان کا کہنا تھا کہ ٹیلی تھون سے جو فنڈز آئیں گے ان کو ثانیہ نشتر دیکھیں گی، ثانیہ نشتر کے ماتحت ایک کمیٹی میں تمام صوبوں کے لوگ شامل ہوں گے اور ٹیلی تھون سے جو پیسہ ملے گا وہ پورے پاکستان میں استعمال ہوگا۔
دوسری جانب پی ٹی آئی رہنما فواد چوہدری نے کہا تھا کہ عدالت نے پابندی ختم کی تو سیلاب زدگان کےلیےٹیلی تھون تمام چینلزپر لائیو ہو گی ، بہرحال 500سے زیادہ ڈیجیٹل پلیٹ فورمز اس نشریات کیلئے استعمال ہوں گے۔