لاہور(پاک ترک نیوز) فائنل میں رسائی کی دوڑ میں پاکستان کو آج آسٹریلیا کاچیلنج درپیش ہے۔
یو اے ای میں جاری ٹی ٹونٹی ورلڈ کپ کے دوسرے سیمی فائنل میں آج پاکستان اور آسٹریلیا دبئی میں دوبدو ہوں گے، نیوزی لینڈ، انگلینڈ کو شکست دے کر پہلے ہی فائنل میں پہنچ چکا ہے۔
ٹی 20 ورلڈکپ کے فیصلہ کن معرکے میں پاکستان اور آسٹریلیا آج میدان سجائیں گے، ناقابل شکست قومی شاہینوں کا فتوحات سے مورال ہائی ہے۔
قومی ٹیم کے کھلاڑیوں نے گزشتہ روز خوب پریکٹس کی ۔بیٹنگ، بولنگ ،فیلڈنگ اور فزیکل فٹنس پر بھی خصوصی توجہ دی۔ بیٹنگ کنسلٹنٹ میتھیو ہیڈن نے بھی فاتحانہ موڈ والا پلان شیئر کر دیا۔
پاکستان کرکٹ بورڈ کے چیئرمین رمیز راجہ نے قومی ٹیم کو دبنگ انداز میں اِن ایکشن ہونے کا مشورہ دے دیا۔ گرین شرٹس پر 11 سال پہلے مائیک ہسی کے چھکوں بھری شکست کے بدلے کا جنون بھی سوار ہے۔ اس فارمیٹ کے تمام انٹرنیشنل مقابلوں میں گرین شرٹس کو برتری حاصل ہے جبکہ ٹیم پاکستان نے 23 میں 12 میچ جیتےاور اسے 9 میں شکست کا سامنا کرنا پڑا۔
دوسری جانب آسٹریلینز نے بھی تیاریاں مکمل کر لیں، جیت کا عز م ظاہر کر دیا۔ آج کے تگڑے مقابلے کیلئے جہاں کھلاڑی پرعزم ہیں وہیں دونوں ممالک کے شائقین بھی پرجوش ہیں۔