ٹی ٹونٹی ورلڈ کپ ، انگلینڈ آسٹریلیا میچ بھی بارش کی نذر

میلبورن(پا ک ترک نیوز )ٹی ٹونٹی ورلڈ کپ کے سپر 12مرحلے میں انگلینڈ اور آسٹریلیا کے درمیان اہم میچ بھی بارش کی نذر ہو گیا ۔
تفصیلات کے مطابق آسٹریلیا کے میلبورن گرائونڈ میں ہونے والا آسٹریلیا انگلینڈ کے اہم میچ میں ٹاس بھی نہ ہو سکا ۔ گرائونڈ بارش کے باعث کئی مقامات پر نرم ہونے کے باعث امپائرز نے میچ منسوخ کردیا ۔
میچ منسوخ ہونے پر انگلینڈ اور آسٹریلیا کو ایک ایک پوائنٹ دے دیا گیا ہے، جس کے ساتھ گروپ اے کی صورتحال دلچسپ ہوگئی ہے۔
گروپ اے میں نیوزی لینڈ، انگلینڈ، آئرلینڈ آسٹریلیا 3، 3 پوائنٹس کے ساتھ بالترتیب پہلی، دوسری، تیسری اور چوتھی پوزیشن پر قابض ہیں جبکہ سری لنکا اور افغانستان کے 2،2 پوائنٹس کے ساتھ پانچویں اور چھٹے نمبر پر موجود ہیں۔
اس سے قبل ٹی ٹونٹی ورلڈ کپ کے سپر 12مرحلے میں آج ہونے والا آئرلینڈ اور افغانستان کا مقابلہ بھی بارش کی نذر ہوگیا تھا، ورلڈکپ میں گروپ اے کا یہ تیسرا مقابلہ ہے جو بارش کے باعث منسوخ کرنا پڑا۔