گیلونگ(پاک ترک نیوز) ٹی ٹونٹی ورلڈ کپ کوالیفائنگ رائونڈ میں متحدہ عرب امارات نے نمیبیا کو شکست سے دوچار کردیا ۔ نمیبیا کی نیدر لینڈز سپر 12مرحلے میں پہنچ گیا ۔
تفصیلات کے مطابق ٹی ٹونٹی ورلڈکپ کوالیفائنگ راؤنڈ کے دسویں میچ میں متحدہ عرب امارات نے نمبیبیا کو 8 رنز سے شکست دیدی، ہار کے بعد نیدرلینڈز کی ٹیم نے سپر 12 مرحلے تک رسائی حاصل کرلی۔
یو اے ای نے ٹاس جیت کر پہلے بیٹنگ کرنے کا فیصلہ کیا اور مقررہ 20 اوورز میں 3 وکٹوں کے نقصان پر 148 رنز اسکور کیے، متحدہ عرب امارات کی جانب محمد وسیم 50 اور کپتان رضوان 43 رنز بناکر نمایاں رہے۔نمیبیا کی جانب سے ڈیوڈ ویزے، برنارڈ شولٹز اور بین شیکونگو نے ایک ایک وکٹ حاصل کی۔
ہدف کے تعاقب میں نمیبیا کی ٹیم کوئی بڑی پارٹنرشپ کرنے میں ناکام رہی، اوپنرز مائیکل وین لنگن اور اسٹیفن بارڈ 16 کے مجموعی اسکور پر پویلین لوٹ گئے جبکہ کپتان گیراڈ ارسمس بھی محض 16 رنز بناسکے۔
دیگر بیٹرز میں جان فرائے لنک 14، زین گرین 2 رنز بنانے میں کامیاب ہوئے، میچ کے اختتامی لمحات میں ڈیوڈ ویزے کے 55 اور روبن ٹرمپلمین کے 24 رنز کی بدولت میچ کا رخ تبدیل ہوا تاہم جیت حاصل کرنے میں ناکام رہے۔
یو اے ای کی جانب سے باسل حمید اور ظہور خان نے 2،2 جبکہ جنید صدیق اور کارتک میاپن نے ایک ایک وکٹ حاصل کی۔
یاد رہے کہ ٹی20 ورلڈکپ میں متحدہ عرب امارات (یو اے ای) کی یہ پہلی فتح ہے۔