لاہور(پاک ترک نیوز) پاک انگلینڈ سیریز کے آخری تین ٹی ٹونٹی میچز میں لاہور میں شائقین کرکٹ کو ای ٹکٹ پر داخلے کی سہولت میسر نہیں ہو گی ۔
پاکستان کرکٹ بورڈ کا کہنا ہے کہ شائقین کرکٹ24 ستمبر تک قذافی اسٹیڈیم سے پرنٹڈ ٹکٹ حاصل کر سکتے ہیں ، جس کا وقت دوپہر 12 سے رات 8 بجے تک ہوگا جبکہ تصدیق کیلیے شناختی کارڈ بھی ہمراہ لانا ہوگا۔
گزشتہ انٹرنیشنل اور پی ایس ایل میچز کے دوران ای ٹکٹ، موبائل تصویر اور فوٹو کاپی کا بارکوڈ سکین کروانے پر داخلے کی اجازت دے دی گئی تھی لیکن اس سہولت کا کئی شائقین نے ناجائز فائدہ اٹھایا۔
ای ٹکٹ کے حامل افراد کا بارکوڈ پہلے ہی سکین ہوجانے کی وجہ سے ان کو اسٹیڈیم میں داخلے کا موقع نہیں مل سکا تھا جس پر شائقین کرکٹ نے مایوسی کا اظہار کیا تھا۔
دونوں ٹیموں کو قذافی اسٹیڈیم میں لانے کیلئے روٹ پر لائٹنگ لگادی گئی ہے جبکہ لبرٹی چوک، پنجاب یونیورسٹی اور گلبرگ کالج میں شائقینِ کرکٹ کے لئے پارکنگ بنائی جائے گی۔