چٹاگانگ(پاک ترک نیوز) چٹاگانگ ٹیسٹ کے چوتھے روز کے اختتام پر پاکستانی ٹیم نے بنگلہ دیش کیخلاف بغیر کسی نقصان کے 109رنزبنا لئے ۔پاکستان کو جیت کیلئے مزید93رنز درکار ہیں جبکہ اس کی 10وکٹیں باقی ہیں۔
تفصیلات کے مطابق پاکستان اوربنگلہ دیش کے درمیان جاری دو ٹیسٹ میچوں کی سیریز کے پہلے میچ میں چوتھے دن کے اختتام پر پاکستان نے میزبان ٹیم کیخلاف 109رنز بنا لئے اور کوئی کھلاڑی آئوٹ نہیں ہوا ہے ۔ اوپنرز عابد علی اور عبداللہ شفیق بالترتیب 56اور53رنز بنا کرکریز پر موجو د ہیں۔
قبل ازیں میزبان ٹیم نے آج اپنی دوسری اننگز کا سلسلہ 4 وکٹوں کے نقصان پر 39رنز سے جوڑا، مشفیق الرحیم کو حسن علی نے 19 ویں اوور کی تیسری بال پر پویلین کی راہ دکھا دی، یاسر علی 36 رنز پر ریٹائر ہرٹ ہو گئے جبکہ مہدی حسن 11 اور نورالحسن 15 رنز بنا سکے۔ لٹن داس نے 6 چوکوں کی مدد سے 59 رنز بنائے تھے کہ شاہین آفریدی نے انہیں ایل بی ڈبلیو کر دیا، ابو جید کو بھی شاہین آفریدی نے صفر رنز پر پویلین کی راہ دکھائی، تاج الاسلام بھی صفر سکور پر ساجد خان کے ہاتھوں شکار ہوئے۔ یوں 157 کے مجموعے پر بنگلا دیش کی پوری ٹیم آوٹ ہو گئی۔ اب پاکستان کو اپنی دوسری اننگز میں202 رنز کا ٹارگٹ حاصل کرنا ہو گا۔
گذشتہ روز بنگالی ٹائیگرز کا دوسری اننگز میں ٹاپ آرڈر فلاپ ہو گیا تھا، شادمان اسلام 1، نجم الحسین شانتو اور مومن الحق صفر رنز پر آوٹ ہوئے، سیف حسن 18 رنز بنا سکے تھے۔ اس سے قبل پاکستان نے بنگلہ دیش کی پہلی اننگز میں 330 رنز کے جواب میں 286 رنز کے ساتھ اپنی پہلی اننگز کا اختتام کیا تھا جس سے میزبان ٹیم کو 44 رنز کی برتری مل گئی تھی۔