کیوی فاسٹ بالر ٹرینٹ بولٹ نے سنٹرل کنٹریکٹ سے علیحدگی اختیار کرلی

لاہور (پاک ترک نیوز) کیوی فاسٹ بالر ٹرینٹ بولٹ نے سنٹرل کنٹریکٹ سے علیحدگی اختیار کر لی۔ٹرینٹ بولٹ نے انٹرنیشنل کرکٹ سے ریٹائرمنٹ کا اعلان نہیں کیا تاہم کنٹریکٹ چھوڑنے کے باعث اب انٹرنیشنل سطح پر کم میچوں میں ہی نیوزی لینڈ کی نمائندگی کر پائیں گے۔
تفصیلا ت کے مطابق نیوزی لینڈ کے فاسٹ بالر ٹرینٹ بولٹ نے سنٹرل کنٹریکٹ چھوڑ دیا۔ 33 سالہ فاسٹ بالر کا کہنا ہے کہ انہوں نے اپنی فیملی کو زیادہ وقت دینے کے لیے یہ فیصلہ کیا۔
نیوزی لینڈ کرکٹ بورڈ کے مطابق انٹرنیشنل کرکٹ کے لیے سنٹرل کنٹریکٹ والے کرکٹرز کو ہی ترجیح دی جاتی ہے۔
ٹرینٹ بولٹ 78 ٹیسٹ میچوں میں 317 وکٹیں جبکہ 93 ون ڈے میچوں میں بھی نیوزی لینڈ کی نمائندگی کرتے ہوئے169 وکٹیں حاصل کیں۔ وہ 44 ٹی ٹوئنٹی میچوں میں 62 وکٹیں بھی حاصل کر چکے ہیں۔