ریاض(پاک ترک نیوز) 2برس بعد غیر ملکی عازمین حج کی پہلی پرواز مدینہ ایئرپورٹ پہنچ گئی ۔جہاں حکام نے ضیوف الرحمن کا استقبال کیا۔ یاد رہے کہ 2 برس سے کورونا پابندیوں کے باعث حج کو صرف مقامی عازمین تک محدود رکھا گیا تھا، تاہم رواں برس اپریل میں سعودی عرب کی جانب سے باقاعدہ اعلان کیا گیا کہ اس سال دنیا بھر سے 10 لاکھ عازمین حج ادا کر سکیں گے۔
انڈونیشیا سے پہنچنے والی پہلی پرواز کے خوش نصیب مسافرآئندہ ہفتوں میں مکہ مکرمہ کے لیے روانہ ہوں گے۔ سعودی حکام نے طویل پابندیوں کے بعد عازمین حج کی آمد کو باعث خوشی قرار دیتے ہوئے کہا ہے کہ مہمانوں کے لیے سہولیات کی فراہمی کو ہرممکن طور پر یقینی بنایا جائے گا۔
واضح رہے کہ رواں برس سعودی عرب نے حج کے لیے 65 سال سے بڑی عمر کے افراد پر پابندی عائد کی ہے جب کہ شرائط پر پورا اترنے والوں کے لیے بھی ویکسین کی تمام منظور شدہ خوراکیں لینا لازم قرار دیا گیا ہے۔