کولمبو(پاک ترک نیوز) قومی کرکٹ ٹیم کے کپتان بابراعظم نے ایمرجنگ ایشیا کپ کے بھارت سے فائنل معرکہ سے قبل شاہینوں کو جیت کیلئے ٹپس دیں۔
قومی کپتان نے ایمرجنگ ایشیا کپ کے فائنل سے قبل کھلاڑیوں کا حوصلہ بڑھایا اور انہیں جیت کیلئے مفید مشورے بھی دیئے ۔
یاد رہے کہ ایمرجنگ ایشیا کپ کا فائنل کل روایتی حریف پاکستان اور بھارت کی ٹیموں کے درمیان کولمبو میں کھیلا جائے گا ۔
پاکستان نے گزشتہ روز سری لنکا کو کولمبو میں پہلی سیمی فائنل میں شکست دے کر فائنل کا ٹکٹ کٹوایا تھا جبکہ بھارت نے سنسنی خیز مقابلے کے بعد بنگلہ دیش کو شکست سے دوچار کر کے ایونٹ کے آخری معرکے میں رسائی حاصل کی تھی۔
روایتی حریف کل کولمبو کرکٹ اسٹیڈیم میں ٹکرائیں گی، میچ پاکستان وقت کے مطابق دوپہر ایک بجےشروع ہوگا۔
بھارتی ٹیم کو اب تک کوئی شکست نہیں ہوئی جبکہ قومی ٹیم کو گروپ میچ میں بھارت کے ہاتھوں شکست کی ہزیمت کا سامنا کرنا پڑا تھا۔
یاد رہے کہ قومی کرکٹ ٹیم بھی اس وقت سری لنکا میں دو ٹیسٹ میچوں کی سیریز کیلئے موجود ہے ۔ گال میں کھیلے گئے پہلے ٹیسٹ میچ میں شاندار کامیابی کے بعد ٹیم اب دوسرے اور آخری ٹیسٹ کیلئے کولمبو میں موجود ہے ۔ دونوں ٹیموں کے درمیان دوسرا اور آخری ٹیسٹ میچ 24جولائی سے شروع ہوگا۔