تہران/منامہ (پاک ترک نیوز)
ایران کے صدارتی مشیر محمد جمشیدی نے کہا ہے کہ بحرین نے روس کے ذریعے ایران کے ساتھ برسوں سے منقطع سفارتی تعلقات بحال کرنے کیپیشکش بھیجی ہے۔
ایرانی اور بحرینی میڈیا میںیہ رپورٹس بحرینی حکام کے کئی عوامی بیانات کے بعد سامنے آئی ہیں جن میں دونوں ملکوں کے درمیان برسوں کی کشیدگی کے بعد ایران کے ساتھ تعلقات کی بحالی کے لیے کھلے دل کا اظہار کیا گیا ہے۔
ایران کے پریس ٹی وی نے جمشیدی کے حوالے سے کہا ہے کہ بحرین نے روس کے ذریعے ایران کو ایران کے ساتھ تعلقات کو معمول پر لانے کا پیغام بھیجا ہے۔سعودی عرب اور ایران کے درمیان کشیدگی میں اضافے کے بعد منامہ نے 2016 میں تہران کے ساتھ سفارتی تعلقات منقطع کر لیے تھے۔ بحرین نے ایران پر 2011 میں ہونے والے حکومت مخالف مظاہروں میں ملوث ہونے کا الزام بھی لگایا تھا۔
سعودی عرب گزشتہ سال چین کی ثالثی میں ہونے والے معاہدے کے تحت ایران کے ساتھ تعلقات کو معمول پر لایا تھا۔اب گزشتہ ماہ ماسکو کے دورے کے دوران بحرین کے بادشاہ حمد بن عیسیٰ الخلیفہ نے کہا تھا کہ خلیجی جزیرہ ایران کے ساتھ بہتر تعلقات کا خواہاں ہے۔
بحرین کی سرکاری خبر رساں ایجنسی بی این اے نے ان کا حوالہ دیتے ہوئے کہا کہ دونوں ممالک کے درمیان تعلقات کی بحالی میں تاخیر کی کوئی وجہ نہیں ہے۔