ریاض (پاک ترک نیوز)
پرتگالی فٹبال سٹارکرسٹیانو رونالڈ و اپنی فیملی کے ہمراہ میڈرڈ سے سعودی دارلحکومت ریاض پہنچ گئے ہیں۔ جہاں ان کا پرتپاک خیرمقدم کیا گیا۔
کرسٹیانو رونالڈو پرائیوٹ جہاز میں پیر کی شب 11بجے کے قریب اپنی فیملی اور معاونین کے ساتھ ریاض پہنچے ہیں۔
عرب میڈیانے النصر کلب کے حوالے سے بتایا ہےکہ آج منگل شام سات بجے اُن کے اعزاز میں مرسول پارک میں دو گھنٹے کی استقبالیہ تقریب ہوگی جہاں وہ معاہدے پر دستخط کریں گے۔بعد ازں پرتگالی فٹبال سٹار ر اپنے مداحوں کے علاوہ پریس کانفرنس سے خطاب کریں گے۔ اس تقریب کو سعودی اور عرب ٹی وی چینلز سے براہ راست نشر کیے جانے کی توقع ہے۔
النصر کلب کے مطابق کرسٹیانو رونالڈو اور فیملی کو ریاض کے معروف ہوٹل میں ٹھہرایا جائے گا۔ بعد ازاں ان کے لیے رہائش کا انتظام کیا جائے گا۔
میڈیا رپورٹس کے مطابق حالیہ برسوں اور مہینوں کے دوران سعودی عرب میں فٹ بال کی متعدد بڑی خبریں آئیں مگر اس جیسی کوئی نہ تھی کہ کرسٹیانو رونالڈو مملکت کے کلب النصر سے کھیلنے کا معاہدہ کر رہے ہیں۔قطرمیں فیفا ورلڈ کپ میں ارجنٹائن کے خلاف سعودی عرب کی جیت یقینی طور پر قوم کے لیے بہت اہم اور ناقابل فراموش لمحہ تھا۔
لیکن جب بات مقامی کلب فٹ بال کی آئے تو اس کا مقابلہ کسی چیز سے نہیں ہو سکتا کہ پرتگال کا سٹار فٹ بالر سعودی لیگ کھیلنے آ رہے ہیں۔دنیائے فٹ بال کے عظیم کھلاڑیوں کو اگلے چند ہفتوں اور مہینوں کے دوران ریاض، جدہ، دمام اور دیگر شہروں میں دیکھا جائے گا اور اسی طرح دنیا کے ہر کونے میں موجود فٹ بال شائقین ان کو سعودی عرب میں کھیلتے دیکھیں گے۔
سعودی فٹبال کلب النصر سے معاہدے کے بعد رونالڈ نے ایک وڈیو پیغام میں اپنے مداحوں سے جلد ملنے کا وعدہ کیا تھا۔