ایشیا کپ میں بہت غلطیاں کیں ،ورلڈکپ سے قبل کوتاہیوں پر کام کریں گے،بابر اعظم

کولمبو (پاک ترک نیوز) پاکستان کرکٹ ٹیم کے کپتان بابراعظم نے کہا ہے کہ ایشیاکپ میں ٹورنامنٹ میں بہت غلطیاں کی ہیں ،ورلڈ کپ سے قبل اپنی کوتاہیوں پر کام کریں گے ۔
سری لنکا میں پریس کانفرنس سے گفتگو کرتے ہوئے قومی ٹیم کے کپتان بابراعظم نے نائب کپتان شاداب خان اور بولنگ آل راؤنڈر محمد نواز کی حمایت کرتے ہوئے کہا کہ شاداب بہت اچھی بولنگ کر رہے ہیں لیکن بدقسمتی سے وہ وکٹیں نہیں مل رہیں، دونوں اسپنرز کی موجودگی میں ہمارے پاس اچھے اسپنرز موجود ہیں۔
انہوں نے کہاکہ ٹورنامنٹ میں بہت غلطیاں کی ہیں، ہماری فیلڈنگ بری تھی جبکہ مڈل اوورز میں وکٹیں نہ ملنے کی وجہ سے ٹیم پر پریشر آرہا ہے، ورلڈکپ سے قبل اپنی کوتاہیوں پر کام کریں گے۔
یاد رہے کہ سری لنکا سے سپر فور مرحلے میں شکست کے بعد جہاں پاکستان ٹورنامنٹ سے باہر ہوگیا وہیں 6 ٹیموں میں محض چوتھی پوزیشن حاصل کرسکا۔
پاکستان کو ایشیاکپ کے اہم میچ میں سری لنکا نے 2 وکٹوں سے شکست دی تھی۔