واشنگٹن(پاک ترک نیوز) امریکہ میں چار پاکستانیوں کو ایران سے یمن حوثی باغیوں کوہتھیار فراہم کرنے کے الزامات کا سامنا ہے ۔
تفصیلات کے مطباق پاکستانی شناختی کاغذات لے جانے والے چار افراد کو امریکی وفاقی عدالت میں حوثیوں کی حمایت میں ایران سے یمن میں ہتھیار پہنچانے کے الزامات کا سامنا کرنا پڑا۔
امریکی محکمہ انصاف نے کہا کہ 10 دیگر افراد کو بھی مادی گواہوں کے طور پر حراست میں لیا گیا، لیکن ان کی شناخت ظاہر نہیں کی گئی۔ ان پر ورجینیا کے مشرقی ضلع کی ایک امریکی عدالت میں بھی فرد جرم عائد کی گئی ہے۔
امریکی سینٹرل کمانڈ نیوی فورسز، بشمول نیوی سیلز، یو ایس کوسٹ گارڈ میری ٹائم سیفٹی اینڈ سیکیورٹی ٹیم کے ارکان کے ساتھ11 جنوری کی رات کو صومالیہ کے ساحل سے دوربحیرہ عرب میں ایک جہاز پر کارروائی کی گئی ۔
ایف بی آئی کے ایک ایجنٹ کاکہناہے کہ جہاز کی تلاشی کے دوران امریکی فورسز نے ایرانی ساختہ جدید روایتی ہتھیار برآمد کر لیے، جن میں درمیانے فاصلے تک مار کرنے والے بیلسٹک میزائل اور اینٹی شپ کروز میزائل کے اہم حصے، ایک وار ہیڈ، اور پروپلشن اور رہنمائی کے اجزاء شامل ہیں۔
محکمہ انصاف نے کہا کہ جس قسم کے ہتھیاروں کا ذخیرہ پایا گیا ہے وہ مبینہ طور پر حوثی فورسز کے ذریعہ بحیرہ احمر اور خلیج عدن میں امریکی فوجی بحری جہازوں اور تجارتی جہازوں پر حالیہ حملوں میں استعمال ہونے والے ہتھیاروں سے مطابقت رکھتا ہے۔