نواز شریف۔ شہباز شریف بجلی چوری کے الزام میں گرفتار

نواز شریف۔ شہباز شریف بجلی چوری کے الزام میں گرفتار
قصور (پاک ترک نیوز)
ملک بھر کی طرح پنجاب میں بھی جاری بجلی چوروں کے خلاف مہم میں لیسکو نے نواز شریف اور شہباز شریف کو بجلی چوری کرتے ہوئے رنگے ہاتھوں پکڑ لیا۔ پولیس نےکارروائی کرتے ہوئے دو بھائیوں کو بجلی چوری کے الزام میں گرفتار کر لیا ہے۔
تفصیلات کے مطابق دونوں بھائیوں کے خلاف درج ایف آئی آر مین درج ہے کہ ملزمان قصور کے علاقے بھسر پورہ میں اپنے گھروں اور ہوٹل میں ڈائریکٹ کنکشن کے ذریعے بجلی چوری میں ملوث پائے گئے ہیں۔
ان دنوں لیسکو حکام کی جانب سےبجلی چوری کے خلاف مہم جاری ہے۔متعدد لوگوں کو اب تک بجلی چوری کے الزام میں گرفتار کیا جا چکا ہے۔ اس حوالے سے لیسکو حکام قصور ڈویژن میں بھی کریک ڈاؤن جاری رکھے ہوئے ہیں جس کے دوران دو ایسے ملزمان کو حراست میں لیا گیا جن کے نام اتفاقیہ طور پر ’نواز شریف‘ اور ’شہباز شریف‘ ولد محمد شریف ہیں۔
اس دلچسپ کیس کے حوالے سے قصور ڈویژن لیسکو کے حکام کا کہنا ہے کہ یہ دونوں بھائی تین مقامات پر بجلی چوری میں ملوث پائے گئے ہیں۔’ان کے دو گھر ہیں جہاں انہوں نے ڈائریکٹ کنکشن لگایا ہوا تھا۔ جبکہ ان کا ایک ہوٹل ہے جس کا نام ’نواز شریف ہوٹل‘ ہے وہاں بھی بجلی چوری کی جارہی تھی۔ ذرائع نے بتایا کہ کہ دونوں ملزمان بدنام بجلی چور ہیں انکے خلاف اب تک 13 کے قریب بجلی چوری کے پرچے بھی ہوچکے ہیں۔ لیکن یہ ضمانت کروا لیتے ہیں اور دوبارہ یہ جرم کرتے ہیں۔