لاہور(پاک ترک نیوز) پاکستان کرکٹ ٹیم دوبارہ سے آئی سی سی ون ڈے رینکنگ میں پہلی پوزیشن پر آ گئی ۔
جنوبی افریقہ کے ہاتھوں آسٹریلیا کی شکست کے بعد پاکستان پھر آئی سی سی ون ڈے رینکنگ میں پہلی پوزیشن پر آگیا، بھارت ایشیا کپ کا فاتح بن کر بھی ون ڈے رینکنگ میں دوسری پوزیشن پر ہے جبکہ پاکستان ایشیا کپ نہ جیت سکا لیکن رینکنگ میں ٹاپ پوزیشن پر آگیا۔
پاکستان اور بھارت کے ریٹنگ پوائنٹس 115 ہیں، البتہ پاکستان کو ڈیسیمل پوائنٹس پر برتری ہونے کی وجہ سے پہلی پوزیشن ملی، آئی سی سی ون ڈے رینکنگ میں آسٹریلیا کی ٹیم 113 پوائنٹس کے ساتھ تیسرے نمبر پر چلی گئی ہے جبکہ جنوبی افریقہ کا چوتھا نمبر ہے۔
یاد رہے کہ گزشتہ روز بھارت نے ایشیا کپ کے فائنل میں دفاعی چیمپئن سری لنکا کو یکطرفہ مقابلے میں شکست دے کر آٹھویں مرتبہ ایشیا کپ کا ٹائٹل اپنے نام کیا۔جنوبی افریقہ نے 5 میچز کی سیریز کے آخری ون ڈے میں آسٹریلیا کو شکست دے کر سیریز 2-3 سے اپنے نام کی۔