سیاست کو اختلاف رائے کے بجائے ذاتی دشمنی تک پہنچادیا گیا،بلاول بھٹو

شانگلہ (پاک ترک نیوز)پاکستان پیپلز پارٹی کے چیئرمین اور سابق وفاقی وزیر بلاول بھٹو کا ک ہنا ہے کہ ملک میں تقسیم کی سیاست عروج پر ہے۔ سیاست کو اختلاف رائے کے بجائے ذاتی دشمنی تک پہنچادیا گیا۔
شانگلہ میں پیپلز پارٹی کے ورکرز کنونشن سے خطاب کرتے ہوئے انہوں نے کہا کہ سیاستدان آج بھی پرانی سیاست کررہے ہیں، میں ملک کا سب سے نوجوان وزیر خارجہ رہا، میرے ہاتھ صاف ہیں۔
پرانے سیاست دانوں کو تنقید کا نشانہ بناتے ہوئے انہوں نے کہا کہ کوئی سیاسی جماعت اور سیاست دان نہیں جس کے ہاتھ صاف ہوں۔ انا کی سیاست کرنے والے پرانے سیاستدان عوامی مسائل سے آگاہ نہیں۔
بلاول بھٹو کا کہنا تھا کہ میں واحد سیاستدان ہوں جو 19 سال کی عمر میں 2007 سے سیاست کرتا آرہا ہوں۔ میں ملک کا سب سے نوجوان وزیر خارجہ رہا، میرے ہاتھ صاف ہیں۔ پاکستان کی سیاست میں ہاتھ صاف رکھنا بڑا مشکل ہوتا ہے۔
سابق وفاقی وزیر نے کہا کہ ایک طرف نفرت اور تقسیم کی سیاست جاری ہے، دوسری طرف معاشی بحران بدسے بدتر ہوتا جارہا ہے۔ ہمیں ٹک ٹاک، گالم گلوچ اور گیٹ نمبر 4 کی سیاست نہیں آتی، ہمارا مقابلہ کسی اور سے نہیں غربت اور بے روزگاری سے ہے۔
انہوں نے کہا کہ روزگار دینا جرم ہے تو یہ جرم بار بار کروں گا، میرے ہاتھوں پر کرپشن کا داغ ہے نہ عوام کے خون کا۔ وعدہ کرتا ہوں 5 سال میں تنخواہیں دگنی کریں گے، میں ثابت کروں گا کہ کیسے ملک اور عوام کی قسمت تبدیل کریں گے۔