پی ایس ایل 9،یونائیٹڈ اور سلطانز آخری معرکہ میں آج مد مقابل

کراچی (پاک ترک نیوز) پاکستان سپر لیگ (پی ایس ایل )کے سیزن 9کے فائنل معرکے میں آج اسلام آباد یونائیٹڈ اور ملتان سلطانز میں جوڑ پڑے گا ۔
تفصیلات کےمطابق پی ایس ایل 9کا فائنل آج کراچی کے نیشنل بینک سٹیڈیم میں کھیلا جائے گا ۔ پاکستانی وقت کے مطابق میچ رات 9بجے شروع ہوگا ۔
اسلام آباد یونائیٹڈ نے پی ایس ایل کے دو فائنلز کھیلے ہیں اور دونوں مرتبہ اس نے ٹائٹل اپنے نام کیا ہے، ملتان سلطانزکو کپتان محمد رضوان، یاسر خان، عثمان خان جیسے بیٹرز کی خدمات حاصل ہیں جبکہ باؤلنگ لائن محمدعلی، اسامہ میر اور ڈیوڈ ولی پہ مشتمل ہے۔
ملتان کا یہ چوتھا فائنل ہے وہ 2021 کی فاتح ہے جبکہ آخری دو فائنلز میں اسے لاہور قلندرز نے شکست دی۔ملتان سلطانز نے پشاور زلمی کو ہراکر فائنل میں جگہ بنائی ہے جبکہ اسلام آباد یونائیٹڈ نے ایلیمنیٹر میں کوئٹہ اور زلمی کو شکست دی۔
اسامہ میر اس پی ایس ایل میں سب سے زیادہ23 وکٹیں لینے والے بولر ہیں محمد رضوان اس وقت بیٹنگ میں 382 رنز بناکر دوسرے نمبر پر ہیں،اسلام آباد یونائیٹڈ کے پاس الیکس ہیلز، کالن منرو، مارٹن گپٹل اور شاداب خان کی شکل میں تجربہ کار بیٹرز موجود ہیں۔
عماد وسیم اور حیدر علی نے زلمی کے خلاف جس طرح بیٹنگ کی ہے اس سے یونائیٹڈ کو بڑی تقویت ملی ہے، یونائیٹڈ کی باؤلنگ میں نسیم شاہ 15 وکٹوں کے ساتھ نمایاں ہیں۔
اسلام آباد یونائیٹڈ کے کپتان شاداب خان کا کہنا ہے کہ انہیں اپنی ٹیم پر فخر ہے کہ اس نے مشکل سچوئشن میں اعصاب پر قابو پاتے ہوئے شاندار کارکردگی کا مظاہرہ کیا ہے۔
ملتان سلطانز کے کپتان محمد رضوان کا کہنا ہے کہ انہیں اس بات کی خوشی ہے کہ ان کی ٹیم نے پورے ٹورنامنٹ میں بھرپور اسپرٹ کے ساتھ کھیلتے ہوئے زبردست پرفارمنس دی ہے۔
ہماری ٹیم تمام شعبوں میں متوازن ہے لیکن ہمیں فائنل میں اپنی تمام تر صلاحیتوں کو بروئے کار لانا ہوگا اور اگر ایسا ہوگیا تو ملتان اور جنوبی پنجاب کے لوگ شاندار نتیجہ دیکھیں گے۔
محمد رضوان کا کہنا تھا کہ مجھے یقین ہے کہ فائنل میں ہمارے کھلاڑی اسی مستقل مزاجی کو برقرار رکھیں گے اور ہمیں ملتان سلطانز کو چیمپئن بنائیں گے۔