معروف شاعر امجداسلام امجد انتقال کرگئے

لاہور (پاک ترک نیوز) معروف شاعر ڈرامہ و کالم نگار اور امجداسلام امجد 78 برس کی عمر میں انتقال کرگئے ۔ان کا انتقال دل کا دورہ پڑنے کے باعث ہوا اہلخانہ نے ان کی وفات کی تصدیق کردی۔
امجد اسلام امجد 4 اگست 1944 کو لاہور میں پیدا ہوئے ، انہوں نے 1964 میں پنجاب یونیورسٹی سے ایم اے(اردو) پاس کیا اور درس وتدریس سے منسلک ہوگئے ، کچھ عرصہ نیشنل سنٹر سے وابستہ رہے ، اگست 1975 میں امجد اسلام امجد کو پنجاب آرٹ کونسل کا ڈپٹی ڈائریکٹر مقرر کیاگیا۔
معروف شاعر امجد اسلام امجد نے ’اردو سائنس بورڈ‘ اور ’چلڈرن لائبریری کمپلیکس‘ سمیت متعدد سرکاری اداروں میں سرکردہ عہدوں پر ذمے داریاں نبھائیں ، ریڈیو پاکستان سے بطور ڈرامہ نگار چند سال وابستہ رہنے کے بعد امجد اسلام امجد نے پی ٹی وی کے لیے کئی سیریلز لکھیں جن میں برزخ ، عکس ، ساتواں در، فشار، ذراپھر سے کہنا (شعری مجموعے)، ’وارث‘، ’دہلیز‘(ڈرامے)، آنکھوں میں تیرے سپنے‘(گیت) ، ’شہردرشہر‘(سفرنامہ)، ’پھریوں ہوا‘ ،’سمندر‘، ’رات‘، ’وقت‘،’اپنے لوگ‘،’یہیں کہیں ‘ شامل ہیں۔
انہوں نے شاعر، ڈرامہ نگار اور نقاد کی حیثیت سے شہرت حاصل کی، امجداسلام امجد کا شعری مجموعہ برزخ اورجدیدعربی نظموں کےتراجم عکس کےنام سے شائع ہوئے مزید برآں افریقی شعراکی نظموں کا ترجمہ کالے لوگوں کی روشن نظمیں کےنام سےشائع ہوا۔تنقیدی مضامین کی ایک کتاب ’تاثرات‘ بھی ان کی تصنیف کردہ ہے۔
امجد اسلام امجد کی نظم و نثر میں 40 سے زیادہ کتابیں زیورِ طبع سے آراستہ ہو چکی ہیں جبکہ وہ اپنی ادبی خدمات کے بدلے میں ’صدارتی تمغۂ حسن کارکردگی‘ اور ’ستارہ امتیاز‘ کے علاوہ پانچ مرتبہ ٹیلی وژن کے بہترین رائٹر، 16 گریجویٹ ایوارڈ اور دیگر متعدد ایوارڈ حاصل کرچکے ہیں۔
صدر مملکت عارف علوی نے معروف شاعر، امجد اسلام امجد کے انتقال پر گہرے دکھ اور افسوس کااظہار کیا ہے ۔
صدر مملکت نے ٹوئٹر پر پیغام میں امجد اسلام امجد کی شاعری کے ساتھ پیغام میں لکھا کہ ہمارے عظیم شاعر ، ڈرامہ نگار انتقال کرگئے ہیں ۔
وزیراعظم شہباز شریف نے امجد اسلام امجد کے انتقال پر گہرے دکھ اور افسوس کرتے ہوئے سوگوار خاندان سے ہمدردی کا اظہار کیا ہے ۔نگران وزیراعلیٰ پنجاب محسن نقوی نے معروف شاعر و ادیب امجد اسلام امجد کے انتقال پر گہرے رنج کا اظہار کرتے ہوئے انکے خاندان سے تعزیت کی ہے ۔