کراچی(پاک ترک نیوز) شاہین شاہ آفریدی خود سے منسوب پی سی بی کے جعلی بیان سے سخت ناخوش ہیں جب کہ انھوں نے سخت احتجاج بھی ریکارڈ کرایا ہے۔
پاکستان کرکٹ بورڈ نے گزشتہ روز شاہین کو کپتانی سے برطرف کر دیا تھا، انھیں اس بات پر رنج تھا کہ بغیر کسی ٹھوس وجہ سے ہٹایا گیا، اتوار کی شام شاہین اس وقت حیرت سے دنگ رہ گئے جب پی سی بی نے قیادت میں تبدیلی کی پریس ریلیز میں ان سے منسوب فرضی جملے بھی شائع کیے۔
شاہین نے فوری طور پر بورڈ سے رابطہ کرکے اس پر احتجاج کیا،وہ سوشل میڈیا پر اس کی تردید بھی کرنا چاہتے تھے مگر قریبی شخصیات نے تنازع کھڑا ہونے کے خدشے کی وجہ سے انھیں باز رکھا،البتہ شاہین کا غصہ رات گئے تک ٹھنڈا نہیں ہوا تھا۔
واضح رہے کہ پی سی بی کی جانب سے جاری کردہ بیان میں شاہین کے حوالے سے کہا گیا تھا کہ قومی کرکٹ ٹیم کی کپتانی کرنا ایک اعزاز کی بات تھی،وہ ہمیشہ ان یادوں اور مواقع کو یاد رکھیں گے۔