لاہور(پاک ترک نیوز) آئی سی سی ٹی ٹونٹی ورلڈ کپ کے سپر 8مرحلے کا آج سے آغاز ہوگا۔امریکہ اور جنوبی افریقہ آج پہلے مقابلے میں آمنے سامنے آئیں گے ۔
آئی سی ورلڈ کپ کے پہلے راؤنڈ میں 20 ٹیموں پر مشتمل چار گروپس کے 40 میچز کھیلے گئے تھے، پہلے راؤنڈ کے اختتام پر 8 ٹیموں نے سُپر مرحلے کے لیے کوالیفائی کیا۔پاکستان پہلے رائونڈ میں ہی میگا ایونٹ سے باہر ہوگیا تھا ۔پہلے راؤنڈ کے میچز کی میزبانی امریکا اور ویسٹ انڈیز نے مشترکہ کی تھی، جبکہ سُپر 8 کے میچز سمیت سیمی فائنلز اور فائنل کی میزبانی ویسٹ انڈیز کرے گا۔
گروپ اے سے بھارت اور امریکا، گروپ بی سے آسٹریلیا اور انگلینڈ، گروپ سی سے ویسٹ انڈیز اور افغانستان جبکہ گروپ ڈی سے جنوبی افریقا اور بنگلہ دیش نے سُپر 8 مرحلے تک رسائی حاصل کی۔
سُپر 8 میں پہنچنے والی 8 ٹیموں کو دو گروپس میں تقسیم کیا گیا ہے، گروپ ون میں افغانستان، آسٹریلیا، بنگلہ دیش اور بھارت جبکہ گروپ ٹو میں انگلینڈ، جنوبی افریقا، امریکا اور ویسٹ انڈیز شامل ہے۔
ویسٹ انڈیز کے جزائر اینٹیگا، سینٹ لوشیا، بارباڈوس اور سینٹ ونسنٹ سُپر 8 مرحلے کے میچز کی میزبانی کریں گے۔سُپر 8 میں ٹیموں کے مابین 12 مقابلے ہوں گے، دونوں گروپس کی ٹیمیں اپنے گروپ کی دیگر تین ٹیموں سے میچ کھیلے گی۔دونوں گروپس کی ٹاپ ٹو ٹیمیں سیمی فائنل کی جنگ کے لیے اہل ہوں گی۔
ٹی 20 ورلڈ کپ سُپر 8 کے مرحلے میں آج پہلا میچ امریکا اور جنوبی افریقا کے درمیان پاکستانی وقت کے مطابق شام 30-7 بجے شروع ہو گا۔
سپرایٹ مرحلے کے شیڈول درج ذیل ہے :
19 جون: امریکا بمقابلہ جنوبی افریقا
20 جون: انگلینڈ بمقابلہ ویسٹ انڈیز
20 جون: افغانستان بمقابلہ بھارت
21 جون: آسٹریلیا بمقابلہ بنگلہ دیش
21 جون: انگلینڈ بمقابلہ جنوبی افریقا
22 جون: امریکا بمقابلہ ویسٹ انڈیز
22 جون: بھارت بمقابلہ بنگلہ دیش
23 جون: افغانستان بمقابلہ آسٹریلیا
23 جون: امریکا بمقابلہ انگلینڈ
24 جون: ویسٹ انڈیز بمقابلہ جنوبی افریقا
24 جون: آسٹریلیا بمقابلہ بھارت
25 جون: افغانستان بمقابلہ بنگلہ دیش
آئی سی سی ٹی 20 ورلڈ کپ کے پہلے سیمی فائنل کی میزبانی 26 جون کو گیانا کرے گا، جبکہ 27 جون کو ہونے والے سیمی فائنل کی میزبانی کے لیے ٹرینیڈاڈ کو منتخب کیا گیا ہے۔
میگا ایونٹ اور عالمی حکمرانی کے سب سے بڑے مقابلے کی میزبانی بارباڈوس کو ملی ہے جہاں 29 جون کو فائنل ہو گا۔