ن لیگ کی طرف سے بائیکاٹ کی باتیں اعتراف شکست ہیں،چودھری پرویز الہٰی

لاہور(پاک ترک نیوز) پاکستان تحریک انصاف کے مرکزی صدر چودھری پرویز الہی کا کہنا ہے کہ ن لیگ کی طرف سے بائیکاٹ کی باتیں اعتراف شکست ہیں،حکومت مذاکرات کرنے کے بجائے بدستور سپریم کورٹ کے خلاف منظم مہم چلا رہی ہے۔
چودھری پرویزالٰہی، چودھری وجاہت حسین اور راسخ الٰہی سے مختلف سیاسی رہنماؤں نے ان کی رہائش گاہ پر ملاقات کی۔ملاقات کرنے والوں میں سابق ضلع ناظم چودھری شفاعت حسین، چودھری محمد الٰہی، چودھری حسن الٰہی، شجاعت نواز اجنالہ، شیخ شہکاز اسلم، ذوالفقار گھمن، مہر کاشف اور دیگر رہنما شامل تھے۔
چودھری پرویزالٰہی کا کہناتھا کہ سپریم کورٹ کی طرف سے مذاکرات کی مہلت ختم ہونے والی ہے، حکومت مذاکرات کرنے کے بجائے بدستور سپریم کورٹ کے خلاف منظم مہم چلا رہی ہے۔
ان کا کہناتھا کہ پنجاب میں ن لیگ کا ٹکٹ کوئی مفت میں لینے کو بھی تیار نہیں، الیکشن کا بائیکاٹ کرکے ن لیگ اپنا بھرم قائم رکھنا چاہتی ہے، ن لیگ کی طرف سے بائیکاٹ کی باتیں اعتراف شکست ہیں، انشاء اللہ پنجاب میں تحریک انصاف کی جیت اور اس کی حکومت اب نوشتہ دیوار ہے۔
چودھری پرویزالٰہی نے کہا کہ حکومت مذاکرات کو تاخیری حربے کے طور پر استعمال کرنا چاہتی ہے لیکن اس مرتبہ شہبازشریف سپریم کورٹ کو چکمہ دینے میں کامیاب نہیں ہو سکیں گے، حکومت ایک تاریخ پر الیکشن میں سنجیدہ ہوتی تو قومی اسمبلی توڑنے کا اعلان کرتی، قومی اسمبلی توڑے بغیر مذاکرات کامیاب نہیں ہو سکیں گے۔