اسلام آباد (پاک ترک نیوز) وزارت موسمیاتی تبدیلی نے جون میں مزید گرمی کی لہروں کی وارننگ جاری کردی ہے ۔
ملک کے تقریباً 26 اضلاع شدید گرمی کی لپیٹ میں ہیں جس نے 21 مئی سے ملک کو اپنی لپیٹ میں لے رکھا ہے، وزارت موسمیاتی تبدیلی نے کہا کہ پہلی لہر 30 مئی تک رہے گی، اس کے بعد جون میں مزید دو الگ الگ ہیٹ ویوز ہوں گی۔
نیشنل ڈیزاسٹر مینجمنٹ اتھارٹی (این ڈی ایم اے) کے سینئر حکام کے ہمراہ ایک پریس کانفرنس سے خطاب کرتے ہوئے، وزیر اعظم کی موسمیاتی تبدیلی سے متعلق کوآرڈینیٹر رومینہ خورشید عالم نے وفاقی اور صوبائی حکومتوں کے محکموں پر زور دیا کہ وہ شدید گرمی کے دوران شہریوں بالخصوص بچوں اور بوڑھوں کی حفاظت کے لیے دستیاب وسائل کو متحرک کریں۔
پاکستان کے محکمہ موسمیات کے اعداد و شمار کا حوالہ دیتے ہوئے رومینہ عالم نے بتایا کہ اس وقت بیشتر علاقوں میں درجہ حرارت معمول سے 5 سے 6 ڈگری سیلسیس زیادہ ہے۔
انہوں نے انکشاف کیا کہ پنجاب، سندھ اور بلوچستان کے 26 اضلاع شدید ہیٹ ویو کے حالات کا سامنا کر رہے ہیں، جس کی توقع تھی کہ موسم گرما میں تین لہریں برقرار رہیں گی۔