پاکستان اور آئر لینڈ کے درمیان دوسرا ٹی ٹونٹی میچ کل کھیلا جائے گا

ڈبلن(پاک ترک نیوز) پاکستان اور آئرلینڈ کے درمیان دوسرا ٹی ٹونٹی میچ کل ڈبلن میں کھیلا جائے گا ۔
تفصیلات کےمطابق پاکستان اور آئر لینڈ کے درمیان تین میچوں پر مشتمل سیریز کا دوسرا ٹی ٹونٹی میچ کل ڈبلن میں کھیلا جائے گا ۔ میزبان ٹیم کو سیریز میں ایک صفر کی برتری حاصل ہے ۔
گزشتہ روز کھیلے گئے میچ میں آئر لینڈ نے پاکستا ن کو پانچ وکٹوں سے شکست دی تھی ۔ یہ آئرش ٹیم کی پاکستان کیخلاف پہلی ٹی ٹوٹنی میچ میں کامیابی تھی ۔
پہلے بیٹنگ کرتے ہوئے قومی کرکٹ ٹیم نے مقررہ 20 اوورز میں 6 وکٹوں کے نقصان پر 182 رنز بنائے، کپتان بابر اعظم 57 اور صائم ایوب 45 رنز کیساتھ نمایاں رہے، دیگر کھلاڑیوں میں محمد رضوان ایک، فخر زمان 20 رنز بناکر آؤٹ ہوئے جبکہ اعظم خان اور شاداب خان بغیر کوئی رن بنائے پویلین لوٹ گئے۔
آئرش ٹیم نے 183 رنز کا ہدف سنسنی خیز مقابلے کے بعد آخری اوور میں 5 وکٹوں کے نقصان پر حاصل کیا، اینڈی بالبرینی 77 رنز کیساتھ نمایاں رہے، ہیری ٹیکٹر 36، جورج ڈوکریل 24، کپتان پال اسٹرلنگ 8 اور لورکن ٹکر 4 رنز بنا کر آؤٹ ہوئے۔
پاکستان کی جانب سے عباس آفریدی نے 2 جبکہ شاہین شاہ آفریدی، عماد وسیم اور نسیم شاہ نے 1، 1 وکٹ حاصل کی۔