ملتان (پاک ترک نیوز) انتظار کی گھڑیاں ختم ، پاکستان سپر لیگ (پی ایس ایل )8کا آ ج سے ملتان میں آغاز ہو گا ۔افتتاحی تقریب کی تیاریاں مکمل ، پہلے میچ میں لاہورقلندرز اور ملتان سلطانز مد مقابل آئیں گی۔
تفصیلات کے مطابق شائقین کرکٹ کیلئے انتظار کی گھڑیاں ختم ہو گئیں، پاکستان سپر لیگ 8کا میلہ سجنے کو تیار ہے،نئی چمچماتی ٹرافی کیلئے 6ٹیمیں آج سے جان لڑائیں گی ،لاہور قلندرز اعزاز کا دفاع کریں گے، میچ رات ساڑھے 7 بجے شروع ہو گا۔
پاکستان سپر لیگ کی افتتاحی تقریب ملتان میں ہو گی، موسیقی کا تڑکا لگے گا، آتش بازی کا بھی شاندار مظاہرہ کیا جائے گا۔
افتتاحی میچ سے قبل لاہور قلندرز اور ملتان سلطانز نے ملتان کرکٹ سٹیڈیم میں بھرپور ٹریننگ کی، پریکٹس سیشن میں دونوں ٹیموں کے کوچز کی جانب سے بیٹنگ، باؤلنگ اور فیلڈنگ کی مختلف تیکنیک اور فٹنس لیول پر توجہ دی گئی۔
محمد رضوان اور حارث رؤف نے بھی سکواڈز کو جوائن کر لیا، قلندرز پہلے ہی میچ میں دھمال ڈالنے کے لیے تیار ہیں، شاہین آفریدی اور حارث رؤف کی نیٹس میں تیز رفتار باؤلنگ نے مخالفین کے لیے خطرے کی گھنٹی بجا دی ہے۔
یاد رہے کہ لاہور قلندرز اور ملتان سلطانز کی ٹیمیں اب تک 13 مرتبہ آمنے سامنے آچکی ہیں، 7 مرتبہ جیت سلطانز کا مقدر بنی، 6 میچز میں قلندرز نے میدان مارا۔
پی ایس ایل کے آٹھویں سیزن کا لاہور فاتحانہ آغاز کرے گا یا ملتان قلندرز سے پچھلے فائنل کا بدلہ لے گا، تمام لوگوں کی نظریں ملتان کرکٹ سٹیڈیم پر مرکوز ہو گئیں۔
دوسری جانب ملتان سٹیڈیم میں تزئین و آرائش کا کام مکمل کر لیا گیا، سٹینڈز کی صفائی ستھرائی کر لی گئی ہے، پچز بھی تیار ہیں، روایتی طور پر پچ سپن کیلئے سازگار رہنے کا امکان ہے۔
کرکٹ ایونٹ کیلئے سکیورٹی انتظامات کا پلان بھی تیار ہو چکا ہے، قانون نافذ کرنے والے اداروں کے تقریباً 8 ہزار اہلکار مختلف مقامات پر خدمات سرانجام دیں گے۔