آئی سی سی اجلاس میں دو طرفہ سیریز کیلئے کوئی بات چیت نہیں ہوئی! بھارتی میڈیا

لاہور(پاک ترک نیوز) بھارت کے میڈیا کی جانب سے دعوی کیا گیا ہے کہ پاکستان کرکٹ بورڈ (پی سی بی) نے بھارت کو دوطرفہ سیریز کھیلنے کی کوئی پیشکش نہیں کی۔
بھارتی نیوز ایجنسی پریس ٹرسٹ آف انڈیا (پی ٹی آئی) نے انکشاف کیا ہے کہ سری لنکا میں جاری انٹرنیشنل کرکٹ کونسل (آئی سی سی) کی سالانہ کانفرنس میں پاکستان اور بھارت کے درمیان دو طرفہ سیریز سے متعلق کوئی بات چیت نہیں ہوئی۔
بھارتی نیوزی ایجنسی نے اپنی رپورٹس میں دعویٰ کیا ہے کہ پاکستان کرکٹ بورڈ ذرائع کا کہنا ہے کہ ہمارا پہلا ہدف آئی سی سی چیمپئینز ٹرافی کی میزبانی کرنا ہے اور بھارت اپنی ٹیم پاکستان بھیجے گا یا نہیں جبکہ دوسرا ہدف چیمپئنز ٹرافی کیلئے بجٹ کی منظوری تھا۔
ہم میٹنگ میں اپنے دو بنیادی ایجنڈوں کیساتھ آئے ہیں، اس لیے دوطرفہ سیریز کے منصوبے سے متعلق غور کا سوال ہی پیدا نہیں ہوتا۔
اس سے قبل سال 2023 ایشیاکپ کیلئے بھی بھارت نے اپنی ٹیم پاکستان بھیجنے سے انکار کردیا تھا بعدازاں ٹورنامنٹ کو ہائبرڈ ماڈل کے تحت کروایا گیا تھا، ایونٹ میں بھارت نے اپنے تمام میچز سری لنکا میں کھیلے تھے۔
پاکستان کرکٹ ٹیم 2023 کے ون ڈے ورلڈکپ کیلئے بھارت کا دورہ کرچکی ہے جبکہ انڈین ٹیم آخری بار سال 2007 میں پاکستان آئی تھی جس کے بعد سے بھارتی ٹیم مختلف بہانے بناکر دورہ کرنے سے انکار کرتی رہی ہے۔
چیمپئینز ٹرافی 2025 کیلئے ممکنہ شیڈول بھی منظر عام پر آچکا ہے جبکہ میچز کی میزبانی اور گروپس کے حوالے سے بھی ٹورنامنٹ میں شریک 8 ٹیموں کو بھیج دیا گیا ہے۔
یاد رہے کہ سیکیورٹی خدشات کے بھارت کے تمام میچز لاہور میں شیڈول رکھے گئے ہیں لیکن بھارتی بورڈ اور حکومت آئی سی سی ایونٹ میں ٹیم بھیجنے سے گریز کررہے ہیں۔