چنئی (پاک ترک نیوز) آئی سی سی ورلڈکپ میں پاکستان اور جنوبی افریقا کے درمیان میچ سے قبل تیز ہواؤں کے ساتھ بارش شروع ہوگئی۔
تفصیلات کے مطابق بھارتی شہر چنئی کے چدم برم اسٹیڈیم میں پاکستان اور سائوتھ افریقہ اپنا چھٹا میچ کھیلیں گی، گزشتہ روز پاکستانی اور جنوبی افریقی کرکٹرز نے پریکٹس سیشن میں حصہ لیا تھا۔
محکمہ موسمیات نے پاک جنوبی افریقا میچ کے دوران بارش کی پیشگوئی کررکھی ہے، آج صبح سے شہر میں تیز ہواؤں کے ساتھ بارش کا سلسلہ وقفے وقفے سے جاری ہے جبکہ آسمان پر بادل منڈلا رہے ہیں۔تیز بارش کی صورت میں میچ تاخیر سے شروع ہونے کا امکان موجود ہے تاہم محمکہ موسمیات نے زیادہ موسلادھار بارش کی پیشگوئی نہیں کی ہے۔
یاد رہے کہ جنوبی افریقا 5 میچوں میں 4 فتوحات کے ساتھ دوسری جبکہ پاکستان 5 میچوں میں 2 فتوحات اور 3 شکستوں کے ساتھ چھٹی پوزیشن پر موجود ہے۔
پاکستان کو سیمی فائنل تک رسائی کیلئے جنوبی افریقا کے خلاف لازمی فتح درکار ہے، میگا ایونٹس میں دونوں ٹیمیں 5 بار ایک دوسرے کے مدمقابل آئی ہیں جہاں پروٹیز کا پلڑا بھاری ہے، انہوں نے 3 میچز میں کامیابی سمیٹ رکھی ہے جبکہ پاکستان محض 2 فتوحات حاصل کرنے میں کامیاب رہا ہے۔ یہ دونوں جیت سال 2015 اور 2019 میں آئی ہیں۔