وانکھنڈے (پاک ترک نیوز) آئی سی سی کرکٹ ورلڈ کپ کے 20 ویں میچ میں جنوبی افریقہ کی انگلینڈ کیخلاف بیٹنگ جاری ہے۔
آئی سی سی کرکٹ ورلڈ کپ کے 20ویں اور آج کے دوسرے میچ میں انگلینڈ اور جنوبی افریقہ آمنے سامنے ہیں، انگلینڈ نے ٹاس جیت کر ساؤتھ افریقہ کو بیٹنگ کی دعوت دی ہے۔
جنوبی افریقہ نے 37اوورز میں5 وکٹ کے نقصان پر246 رنز بنا لیے ہیں۔
ٹاس کے موقع پر انگلش کپتان جوز بٹلر نے کہا کہ کوشش کریں گے جنوبی افریقہ کیخلاف اچھی کرکٹ کھیلیں، انگلش ٹیم میں 3 تبدیلیاں کی ہیں، گس اٹکنسن، ڈیوڈوِلی، بین اسٹوکس کو ٹیم میں شامل کیا گیا ہے۔
دوسری جانب جنوبی افریقی کپتان ٹمبابا ووما بیماری کی وجہ سے میچ سے باہر ہوگئے، جنوبی افریقی ٹیم کی قیادت ایڈین مارکرم کررہے ہیں۔
انگلینڈ کو اپنے گزشتہ میچ میں افغانستان جبکہ جنوبی افریقہ کو نیدرلینڈز کیخلاف اپ سیٹ شکست کا سامنا کرنا پڑا تھا۔
دفاعی چیمپئن انگلینڈ اور جنوبی افریقہ کے درمیان یہ میچ وانکھنڈے میں کھیلا جارہا ہے، ورلڈ کپ میں انگلش ٹیم تین میچ کھیلی ہے جس میں سے صرف ایک میچ ہی جیتی اور افغانستان کیخلاف اپ سیٹ شکست کا سامنا کرنا پڑا۔
پروٹیز نے سری لنکا اور آسٹریلیا کو قریب بھی نہ آنے دیا مگر نیدرلینڈز سے شکست کھا گئے۔
دونوں ٹیموں کے درمیان مقابلوں میں جنوبی افریقہ کو برتری حاصل ہے، ساؤتھ افریقہ نے 79 میں سے 33 جیتے، جبکہ تیس میچ انگلینڈ کے نام رہے۔
عالمی ایونٹ میں انگلینڈ نے بازی ماری ہے، انگلش ٹیم نے 7 میں سے 4 میں کامیابی سمیٹی ہیں، جنوبی افریقہ آج جیتا تو ورلڈکپ میں ریکارڈ برابر ہوجائےگا۔